1 Or trois jours apres on faisoit des nopces à Cana de Galilée: et la mere de Jesus estoit là.

2 Et Jesus fut aussi convié aux nopces et ses disciples.

3 Or le vin estant failli, la mere de Jesus lui dit, Ils n'ont point de vin.

4 Mais Jesus lui [respon]dit, Qu'y a-t'il entre moi et toi, femme? mon heure n'est point encore venuë.

5 Sa mere dit aux serviteurs, Faites tout ce qu'il vous dira.

6 Or il y avoit six cruches de pierre, mises selon l'usage de la Purification des Juifs, lesquelles contenoyent chacune deux à trois mesures.

7 Et Jesus leur dit, Emplissez ces cruches d'eau. Et ils les emplirent jusques au haut.

8 Alors il leur dit, Versez[-en] maintenant, et [en] portez au maistre d'hostel. Et ils lui en porterent.

9 Quand le maistre d'hostel eut gousté l'eau qui avoit esté convertie en vin, (Or il ne sçavoit d'où cela venoit, mais les serviteurs qui avoyent puisé l'eau le sçavoyent bien) il appella le marié,

10 Et lui dit, Tout homme sert le bon vin le premier, puis le moindre apres qu'on a beu plus largement: [mais] toi, tu as gardé le bon vin jusques à maintenant.

11 Jesus fit ce commencement de signes à Cana [ville] de Galilée, et manifesta sa gloire: et ses disciples creurent en lui.