João 4:31-34+ - Bíblia Online

Då no Jesus fekk vita at farisæarane hadde høyrt han vann fleire læresveinar og døypte fleire enn Johannes 
- endå det var ikkje Jesus sjølv som døypte, men læresveinarne hans - 
so tok han ut frå Judæa og for til Galilæa att. 
Han laut fara gjenom Samaria, 
og kom då til ein by i Samaria som heiter Sykar og ligg tett ved den marki som Jakob gav Josef, son sin. 
Der var Jakobs-kjelda. Jesus var trøytt etter ferdi, og sette seg beint ned der innmed kjelda; det var ikring den sette timen. 
Då kjem det ei kvinna frå Samaria og vil draga upp vatn. Jesus segjer til henne: «Lat meg få drikka!» 
For læresveinarne hans hadde gjenge inn til byen og skulde kjøpa mat. 
«Korleis hev det seg,» segjer den samaritanske kvinna, «at du, som er jøde, bed meg, ei samaritansk kvinna, um drikka?» - for jødarne hev ikkje nokoslag samlag med samaritanarne. 
Jesus svara: «Dersom du kjende Guds gåva, og visste kven han er, han som bed deg um drikka, so bad du honom, og han gav deg livande vatn.» 
«Herre,» segjer kvinna, «du hev ingen ting å draga upp med, og brunnen er djup! Kvar hev du då det livande vatnet frå? 
Er då du større enn Jakob, ættfaren vår, som hev gjeve oss brunnen? han hev sjølv drukke av honom, og sønerne og feet hans med.» 
Jesus svara: «Kvar den som drikk av dette vatnet, vert tyrst att, 
men den som drikk av det vatnet eg vil gjeva honom, vert aldri tyrst meir; for det vatnet eg gjev honom, vert i honom til ei kjelda med vatn som vell upp til ævelegt liv.» 
«Herre,» sagde kvinna, «gjev meg det vatnet, so eg ikkje vert tyrst meir, og ikkje treng koma alt hit og draga upp vatn!» 
Han segjer til henne: «Gakk og henta mannen din, og kom hit att!» 
«Eg hev ingen mann,» svara kvinna. «Det er rett som du segjer, at du ikkje hev nokon mann,» sagde Jesus; 
«for du hev havt fem menner, og den du hev no, er ikkje din mann. No sagde du sant.» 
«Herre, eg ser at du er ein profet!» sagde kvinna. 
«Federne våre tilbad Gud på dette fjellet, og de segjer at det er i Jerusalem ein skal tilbeda honom.» 
Jesus segjer til henne: «Tru meg, kvinna; det kjem ei tid då de ikkje skal tilbeda Faderen på dette fjellet og ikkje i Jerusalem heller. 
De tilbed det de ikkje kjenner, me tilbed det me kjenner; for frelsa kjem frå jødarne. 
Men det kjem ei tid, og ho hev alt kome, då dei rette tilbedarane skal tilbeda Faderen i ånd og sanning; for slike tilbedarar er det Faderen vil hava. 
Gud er ånd, og dei som tilbed honom, lyt tilbeda i ånd og sanning.» 
Kvinna segjer til honom: «Eg veit at Messias kjem» - Messias er det same som Kristus -; «når han kjem, skal han læra oss alt.» 
Jesus segjer til henne: «Det er eg - eg som talar med deg.» 
I det same kom læresveinarne hans. Dei undra seg yver at han tala med ei kvinna; like vel var det ingen som sagde: «Kva vil du henne?» eller: «Kvi talar du med henne?» 
So let kvinna vatskrukka si standa, og gjekk av stad til byen og sagde til folki: 
«Kom, so skal de sjå ein mann som hev sagt meg alt eg hev gjort! Skal tru han er Messias?» 
Då gjekk dei ut or byen. Med dei var på vegen til honom, 
bad læresveinarne honom: «Et, rabbi!» 
Han svara: «Eg hev ein mat som ikkje de veit um.» 
Då sagde læresveinarne seg imillom: «Tru nokon hev bore mat til honom?» 
Jesus segjer til deim: «Min mat er at eg gjer det han vil som sende meg, og fullfører hans verk. 
Segjer ikkje de: «Det er endå fire månader fyrr hausten kjem?» Men høyr kva eg segjer dykk: Lyft upp augo dykkar og skoda åkrane, korleis dei alt gulnar mot hausten. 
Den som haustar fær løn, og samlar grøda til ævelegt liv, so dei skal få gleda seg saman både den som sår og den som haustar. 
For her høver det ordet: «Det er ein som sår og ein annan som haustar.» 
Eg hev sendt dykk ut til å hausta det som de ikkje hev havt noko arbeidt med; andre hev havt arbeidet, og de hev gjenge inn i arbeidet deira.» 
Det var mange av samaritanarne frå den byen som trudde på honom for det som kvinna hadde sagt då ho vitna: «Han hev sagt meg alt eg hev gjort!» 
Då no samaritanarne kom til honom, bad dei at han vilde vera hjå deim, og han vart verande der tvo dagar. 
Og mange fleire trudde for skuld ordet han tala, 
og dei sagde til kvinna: «No trur me ’kje lenger for skuld det du hev tala; for me hev sjølve høyrt honom og veit no for visst at han er den som skal frelsa verdi.» 
Då dei tvo dagarne var lidne, tok han ut derifrå og for til Galilæa; 
for Jesus vitna sjølv at ein profet vert ikkje æra i sitt eige fedreland. 
Då han no kom til Galilæa, tok galilæarane vel imot honom; dei hadde set alt det han gjorde i Jerusalem på høgtidi; for dei var sjølve komne til høgtidi. 
So kom han då atter til Kana i Galilæa, der han hadde gjort vatn til vin. I Kapernaum var det ein kongsmann som hadde ein sjuk son. 
Då han fekk høyra at Jesus hadde teke ut frå Judæa og var komen til Galilæa, gjekk han til honom og bad at han vilde koma ned og lækja son hans; for han låg på det siste. 
Jesus svara: «Ser de ’kje teikn og under, so trur de ikkje.» 
Kongsmannen segjer til honom: «Herre, kom ned innan barnet mitt døyr!» 
Jesus segjer til honom: «Gakk heim att! Son din liver.» Mannen trudde det Jesus sagde til honom og gjekk. 
Då han alt var på heimvegen, kom tenarane hans imot honom og sagde at guten hans livde. 
So spurde han deim kva tid det hadde vorte betre med honom. «I går den sjuande timen slepte sotti honom,» sagde dei. 
Då skyna faren at det var i den same timen som Jesus hadde sagt til honom: «Son din liver,» og han trudde, både han og heile hans hus. 
Dette var det andre teiknet Jesus gjorde då han no atter kom frå Judæa til Galilæa. 
João 5