1 Alle thingis han tyme, and alle thingis vndur sunne passen bi her spaces.

2 Tyme of birthe, and time of diyng; tyme to plaunte, and tyme to drawe vp that that is plauntid.

3 Tyme to sle, and tyme to make hool; tyme to distrie, and tyme to bilde.

4 Tyme to wepe, and tyme to leiye; tyme to biweile, and tyme to daunse.

5 Tyme to scatere stoonys, and tyme to gadere togidere; tyme to colle, and tyme to be fer fro collyngis.

6 Tyme to wynne, and tyme to leese; tyme to kepe, and tyme to caste awei.

7 Tyme to kitte, and tyme to sewe togidere; tyme to be stille, and tyme to speke.

8 Tyme of loue, and tyme of hatrede; tyme of batel, and tyme of pees.